Халқ ила бир ватанда, битта танда бўлгаймиз,
Шу ватанда туғилдик, шу ватанда ўлгаймиз.

Раҳмдил ва меҳрибон Оллоҳ номи билан бошлайман.

Агар сиз Нурсафардийни топмоқчи бўлсангиз уни халқнинг ичидан изланг. Чунки Нурсафардийя фалсафаси илоҳий бир тариқат сифатида халқ фалсафаси бўлиб юзага чиқди. Буюк аждодлар йўлидан бориб, халқпарварлик, ватанпарварлик тамойиллари асосида вужудга келган Нурсафардийя миллатимиз орасида эзгулик амалларини, саховат уруғини, яхшилик, адолат, хокисорлик, миллатимизнинг ўзлигини асрашга ундаш, тафаккурини улуғлашга, миллий қадриятларимизни ёшларимизнинг онгига сингдиришга, ватанни, миллатни севишга, давлатга сидқидилдан хизмат қилишга ўргатса, кимлардир халқона бундай фалсафани диний оқимга ёйиб, динни ниқоб қилган ҳолатда бизнинг эзгулик амалларимизга тош отмоқдалар.

Сизнинг мақсадингизни англай олмаяпмиз, жаноблар.

Биз муқаддас динимизни ҳурмат қиламиз, лекин диндан йироқмиз.

Биз давлатимиз сиёсатини юксак қадрлаймиз, лекин сиёсатдан йироқмиз.

Бизнинг эзгулик амалларимиз халқона ва унинг  бирор бир негизига ҳеч қандай диний оқимнинг асоси йўқ.

Нурсафардийянинг йўли бу руҳий устозларимиз Нажмиддин Кубронинг, Баҳоуддин Нақшбанднинг, Ҳожа Аҳмад Яссавийнинг йўлидир. Биз буюк аждодлар йўлидан бориб, халқимизга ҳикмат айтмоққа жазм этдик. Миллатимиз фарзандларини ватанни севишга, давлатимизга сидқидилдан хизмат қилишга, миллий анъаналарни қадрлашга ўргатдик.

Сиз биздан нима истайсиз ўзи? Нурсафардийянинг халқона эзгулик фалсафасига тош отиб нимага эришасиз?

Нима, миллатимиз ичидан гўзал бир миллатпарварлик туйғуси билан халқимизга эзгулик улашадиган фалсафа чиқса бунинг нимаси ёмон. Биз танлаган буюк аждодлар йўли сизга нимаси билан ёқмай қолди?

Сиз курсингизда ўтирган ҳолда амалингизни йўқотишдан қўрқмоқдасизми? Сиз халқона фалсафа бўлган халқ фалсафасига қарши бораяпсизми? Аждодлар удумига қарши бораяпсизми?

Сизнингча буюк авлиёлар йўлини сизнинг замонингизда ўчириб ташлаш керак эканда.

Англаб турибмизки, сизни ҳар қандай эзгулик фалсафасига қарши курашадиган қалтис қуролингиз бор.  Бу юртдан ҳар қандай эзгулик амали чиқса бу диний оқим деб жар соласиз. Диний оқимларни қурол қилиб олгансиз. Тап тортмасдан ҳар қандай эзгуликни эзиб ташлашга ошиқасиз.

Шошманг биродар. Халқ фалсафасини йўқ қилиб бўлмайди. Нурсафардийя фалсафаси халқона тамойиллар, миллий анъаналар асосида вужудга келган. Сиз бу анъанани йўқ қилолмайсиз. Бизнинг амалларимизда миллатимиз равнақи, камолоти ва мукаммаллиги мужассамдир. Биз давлатимиз раҳбарияти сиёсатини қўллаб қувватлаймиз. Биз халқ ичида бўлганимиз учун ҳам миллий қадриятларимизни  асрашга бел боғлаб, уни келажак авлодларга етказмоққа, азалий мукаммаллик сирларини ўрганмоққа қадам қўйганмиз.

Сиз жаноблар ўз амалларингиздан фойдаланиб  шахсий манфаат, бойлик орттиришдан ўзга нимани ўйлайсиз? Сизга бойлик керак, халқ манфаати, миллат равнақи эса сизни қизиқтирмаслигини англаб турибмиз. Акс ҳолда миллий қадриятлар йўлида туриб топган пулини халқ манфаати йўлида сарф қилаётган Нурсафардийя фалсафасига, халқ фалсафасига қарши курашмаган бўлардингиз. Биз саховат қилаяпмиз, - деб мақтанмаймиз, эл соғлиги йўлида оёғимизни тоғу- тошлар кесиб, машаққат билан терган доривор гиёҳларимиз билан халқимизнинг дардига малҳам бўлаяпмиз, - деб ўзимизни реклама қилмаймиз. Сиз бизнинг эзгулик томонимизни кўролмайсиз. Яхшилик айтилмайди, миннат қилинмайди. Сиз эса ана шу яхшиликдан айб излайсиз, сизнингча халққа яхшилик қилиш керак эмас, сизнингча меҳр-оқибат бўлиши керак эмас. Сизнингча миллатни манқуртликда ушлаб туриш кўпроқ фойда келтирса керак. Сиз миллатпарварлик, ватанпарварлик, халқпарварлик туйғуларидан йироқдасиз. 

Сиз ўзингиз учун жаннат барпо этиб роҳатда юрибсиз. Хатойингиз жуда кўплигини яхши англайсиз. Шу сабаб ҳам ҳамиша амалингизни йўқотиб қўйишдан қўрқиб, эзгуликни синдиришга уриниб турасиз. Сизнингча, халқнинг кўзи очилиши керак эмас. Халқ манқурт бўлса сиз учун шунча яхши. Пишагингизни пишт демаса-ю истаганингизча яшайверсангиз. Ё, давлатимиз раҳбариятини писанд қилмай, давлатни ўзингизники қилиб олдингизми?

Нурсафардийя фалсафасининг вужудга келганига йигирма йил бўлди. Деярли мустақил юртимиз билан тенг ёшда. Виждонан айтингчи, шу вақт мобайнида биздан нима ёмонлик кўрдингиз? Халқ ичида эзгулик амалларимиз билан яшаб юрибмиз. Бирор бир китобимизда, илмий рисоламизда ёхуд амалимизда ва ёйинки сўзимизда давлатга нисбатан ножўя гап ёхуд сиёсатимизга қарши варақа ёзув топдингизми? Тополмайсиз ҳам. Чунки биз сиз каби ўз ватанига, ўз халқига, ўз давлатига тош отадиганлар хилидан эмасмиз?

Давлатимиз томонидан озод юрт, мисоли жаннатга айлантирилди. Шаҳарларимизнинг кўркамлиги ҳеч бир давлатнинг гўзаллигидан қолишмайди. Бу юртдаги тинчлик осойишталикни юксак қадрлаймиз. Ҳар қандай давлат ҳам мустақиллигининг илк даврларида иқтисодий қийинчиликни бошидан кечиради. Америкадек қудратли давлат ҳам мустақил бўлганидан сўнг қирқ саккиз йил иқтисодий қийинчилик ичида турган. Нима, биз ёмон яшаяпмизми? Агар иқтисодий қийинчилик бўлса халқимиз чидаб беради. Ўз тинчлигини бузиб, сиз каби бош кўтармайди. Халқимиз сабр бардошли халқ. Ҳали буюк келажак олдинда. Биз халқни сабрга ўргатамиз. Биз меҳр-оқибат куйчиларимиз. Юртда осойишталик бўлмаса бизнинг эзгулик амалларимиз зое кетади. Биз халқмиз, сиз эса халқни тинчлигини бузиб нималаргадир эришмоқчисиз. Сиз тинч ва осойишта юртда яшашни кўтара олмаяпсиз. Сизнинг ҳаракатларингизда миллатни миллатга қарши қўйиш, юрт осойишталигини бузиш сингари ёвуз ният кўриниб қолмоқда. Тинчлик, хотиржамликка шукр қилмоқдан йироқ кетганга ўхшайсиз.

Нима, сизнинг мақсадингиз ана шу тинчликка, осойишталикка путур етказишми?

Биз тинчлик, осойишталик, халқимизни эзгуликка чорлаш, миллий анъаналаримизни эсон-омон келажак авлодларга етказмоқ, тинчликни қадрига етмоқ туйғулари билан яшамоқдамиз.

Сизга нима керак? Сиз халқ фалсафасига қарши бориб, тинч ва озод юртга бузғунчиликни олиб кирмоқчимисиз? Ё, Нурсафардийяни қурол қилиб олиб бу юртдаги тинчлик, осойишталикка путур етказмоқчи бўлаяпсизми? Ё, сиз Нурсафардийяни қурол қилиб олиб халқни кўзғаб давлатга эгалик қилмоқчи бўлаяпсизми? Сиз Нурсафардийя эвазига давлатга қарши бораяпсизми?

Сизнинг фикрингиз тўғри бўлганда матбуот орқали эзгулик, халқона фалсафани қораламай, бизнинг ҳикматларимиздан баҳра олган бўлардингиз. Сизнинг фикрингиз тўғри бўлганда, Озодлик радиоси орқали бутун дунёга ўзбек миллати номига лой чаплаш  ўрнига, келиб дуоларимизни олган бўлардингиз.

Сизнинг ҳар сафар такрорлаётган асоссиз танқидингиз ва нотўғри ахборотингиз тўтиқушнинг сайрашига ўхшайди. Лекин тўтиқуш яхши хабарларни такрорлайди. Сизчи... Сизнинг ҳатти-ҳаракатларингиз ғийбатчи ва туҳматчи аёлларникига ўхшаб қолмоқда. Балким, ҳақиқатдан ҳам сиз аёлдирсиз, яхши аёл бўлишингизни тилаб қолардик.

Биз бир миллат ичидамиз. Яхшимизми, ёмонмизми орамизда қолиши керак эмасми? Бир миллат бўлиб ўз- ўзимизни бутун оламга шарманда қилиш сизга нимага керак бўлиб қолди? Келинг, биз халқ йўлида туриб ёмон эканмиз, лекин бутун миллат номини олам миқиёсида булғашга нима ҳаққингиз бор? Сизга моҳиятни англамасдан туриб, айбимизни исбот этмасдан, камтар бир эзгулик фалсафасидан фил ясаб Ўзбекистонимизнинг тинч ҳаётини нотинчликка ёйиб, олам миқиёсида шов-шув қилишга ким ҳуқуқ берди. Ё, давлат бошлиқларини писанд қилмай, давлатни ўзингизники қилиб олдингизми? Бу ҳолат бошимизда турган давлатимиз шаънига ҳам путур етказмайдими?

Сизга миллат шаъни керакми ўзи? Керак бўлганда нега ўзбек миллатини кичкина эзгулигини қоралаб, бутун дунёга жар соласиз? Мақсадингизни тушуна олмадик... Нега бизнинг халқона фалсафамизни баҳона қилиб бутун Ўзбекистон номини оламга жар солганча миллатдошлар орасида ғулғула, ваҳима уйғотасиз? Бу ҳаракатингиз билан Ўзбекистонимиздаги тинчлик, хотиржамликни йўққа чиқармоқчимисиз?

Бундай нарса рўй берадиган бўлса нима бўлишини сиз ҳатто тасаввур ҳам қилолмайсиз...

Агар бизнинг эзгулик амалларимиз хато бўлса миллат шаъни учун ўлимга ҳам тайёр эдик. Сизга миллат шаънини аҳамияти йўққа ўхшайди. Истаганингизча олам миқиёсида ўзбекларнинг ички муаммолари ҳақида жар солишдан ҳам тап тортмайдиганга ўхшайсиз. Биз ўзбекмиз, сиз ўзбексиз бизнинг шаънимизга ёғилган ножўя танқид бу сизнинг ўзингизга ҳам тегмайдими? Халқимизда ажойиб бир ҳикмат бор. “Яхши келин уйдаги гапни кўчага чиқармайди...” Ўзбекистон бу бизнинг уйимиз... Сиз, ҳатто яхши келинлар сир сақлайдиган, уйимизнинг муносабатларини ғийбат қилиб оламга чиқариб ўтирибсиз. Сизда ўзбекона ғурур, эркаклик ғурурини кўрмадик...

Англангки, сиз жаноблар, Нурсафардийя фалсафасининг моҳиятини англамасдан уни қоралашга ҳаққингиз йўқ. Сиз ваҳима кўтараётган муридларим ҳақидаги фикрларингиз ноўрин. Бизнинг фалсафа эзгуликдан ўзга ҳеч нарса эмас. Сиз қўрқиб турган жангариларни бошқа ёқдан изланг. Биз жанг санъатини ўз мукаммаллигимиз учун олиб бориб, уни санъат даражасига кўтарамиз. Аждодларимиздан мерос бўлиб келган ўзимизнинг жанг санъати билан шуғуллансак, бунинг нимаси қўрқинчли? Нега Япония каратэ билан, Таиланд тайбокс билан, Хитой ўз ушуси билан фахрланади-ю, биз ўз жанг санъатимиз билан фахрланмайлик? Нега улар ўз жанг санъатларини давлат миқиёсида кўтариб унинг шон-шуҳратини бутун оламга ёядилару, бизга мумкин эмас? Нега? Сизга мукаммал миллат керак эмасми? Биз ватан ичида сиз билан битта миллатмиз. Биз ўз жанг санъатимизни юксалтириб, сиз каби миллатдошимизга қарши жанг қиламизми? Биз ўз миллатимизга ўзимиз қўл кўтарамизми?

Сиз ўз амалларингиз орқали ўз манфаатингизни бойитиб амал курсингиздан қўрқиб юрсангиз, сизни биздан бошқа жазолайдиган йўқми? Демак, сиз давлатдан қўрқмайсиз. Сиз мукаммаллик йўлида халқ йўлида турган бизнинг фалсафадан чўчийсиз. Сиз давлатни писанд қилмайсиз. Нурсафардийя халқона фалсафа бўлгани учун ҳам бу тариқатнинг шогирдлари чинданам кўпчиликдир. Улар сизнинг ёнингизда турган бўлишлари ҳам мумкин. Лекин сизга қарши бормаяптиларку. Бизнинг шогирдлар сизнинг хизматингизда турибдиларку. Улар ёнингизда турсалар ҳам ёмонлик қилмайдилар. Уларнинг онгларидан ёмонлик туйғуларини ўчириб ташлаганмиз. Улар сиз ёмон бўлсангиз ҳам яхшилик билан жавоб бермоқдалар. Ана шу бизнинг фалсафа, ана шу бизнинг тариқат.

Зикр нима, Зикр Оллоҳни ҳам тилда, ҳам қалбда ёд олишдир. Сиз аждодлар удумини, авлиёлар илмини ўрганинг. Ўшанда бизнинг амаллар ҳеч қандай диний оқим эмаслигига амин бўласиз.

Нурсафардийя бу Илоҳ изми билан рўй берган халқ орасидаги мукаммал фалсафадир.

Сиз каби дунёвий роҳатда яшамоқни биз хоҳламасмидик. Камина илоҳий олам ичидаман ва нимаики рўй бераётган бўлса фақат Илоҳ изми билан рўй бермоқда. Сиз илоҳий олам фалсафасига қарши бориб, етти пуштингизни бадном қиласиз. Бизнинг ортимизда Яратувчи турибди. Оллоҳ турибди. Мен тунларни тонгга улаб илоҳий олам ичра зикрим орқали Унга мурожаат қиламан, - эй Оллоҳ, нега бу фалсафани менга бердинг. Бандаларинг барибир мени тушунмайдилар, бу йўл билан мени азобга солдинг, - деганимда, Оллоҳ айтади, - Сенинг ишинг айтмоқдир. Йўлингда давом эт, қувват мендандир...

Куброни туш кўраман, - тарикат муборак, - дейдилар ул зот. Нақшбандий тушларимга кириб, - шариатга яқин тур... - дейдилар. Руҳий устозимиз Яссавий, - узлат сен учун эмас, курашмоқ керак, - дейдилар. Оллоҳ айтади, - Сени илм учун жонингни сақлайман...

Менга бундай оғир юкни кўтариш осон эмас, биродар. Сиз дунёвий роҳатда юриб, илоҳий ишқ машаққатини қаердан ҳам биласиз. Агар сиз Оллоҳнинг мавжудлигини бир сония ҳис қилганингизда, сизга кўзимиз учиб турмаган бўлсада, Оллоҳнинг суюкли бандаси бўлганимиз учун ҳам келиб, этагимиздан ўпган, дуоларимизни олган бўлардингиз. Оллоҳга иймон келтирмоқ керак. Тўрт кунлик дунё ўтар кетар. Сезмай қоласиз.

Сизнинг харакатларингиздан маълумки, халқнинг ўзлигини англаши сизга керак эмас. Демак, сиз халқ душмани бўлиб чиқаяпсиз. Демак, бизни халкпарварлик фалсафасини эмас, сизни жазолаш керакка ўхшайди. Миллатимиз доно халқ. Аждодлари буюк ўтган бу миллат яхши ёмонни тезда ажратиб олишини унутманг. Оқибатни ўйланг. Халқ қудратдир, унинг оёғи остида чивиндек эзилиб қолишингиз мумкин. Ўшанда сизнинг амалингиз ҳам ёрдам беролмайди. Халқнинг осойишталигини бузманг.

Биз англаяпмизки, сиз давлат душманига ўхшаб турибсиз. Бизку халқ ичида оддий, эзгулик кишиларимиз. Бизга сиёсатнинг ҳам, иқтисоднинг ҳам қизиғи йўқ. Давлатимиз тинчлиги йўлида давлатимизнинг ўзи бош қош. Биз англаб турибмизки,  сизнинг истагингиз давлатнинг юқори лавозимларида ўтиришдир. Сиз халқимизни манқуртлик гирдобида ушлаб халқ устидан ҳукм юритмоқчисиз. Назаримизда сизга манқурт халқ керак. 

Англашингиз лозимки, давлатимиз эзгулик ва ҳикмат йўлида турган эзгулик куйчиларини ҳамиша қадрлаб келган. Биз давлатимизни қанча ҳурмат қилсак, давлатимиз бизни шунча ҳимоялайди. Сиз каби миллат обрўсини тўкиб, оламга жар солаётганлар эса халқнинг ғазаби ва қарғишига учрашига шубҳамиз йўқ.

Биз аждодларнинг илоҳий илмларини юзага олиб чиққан ҳолатда уни давлатимиз шарафи ва обрўси учун бутун дунёга кўз-кўз қиламиз. Бизнинг жаннат юртимиз илоҳий авлиёлар юрти. Биз уларнинг изидан борган ҳолатда давлатимиз тараққиёти билан ёнма ён мозийнинг буюк илмларини олам саҳнига олиб чиқиб илоҳий илмлар борасида ҳам ҳеч кимдан кам эмаслигимизни исбот қиламиз.

Амалингизга путур етмаслиги учун халқ фалсафасига тош отмасдан ватанни хизматини қилиб юраверинг. Сиз бойлик орттириш илинжида роҳат фароғатда яшанг. Гуноҳингиз учун бизга эмас, Оллоҳ олдида жавоб берасиз. Сизнинг роҳатингиз ўзингизники. Кўриниб турибдики, сизнинг сохта ватанпарварлигингиз ватан учун халқ учун қийматга эга эмас. Ватанпарварлик, халқпарварлик йўлида хизмат қилмоқ бизга ҳиммат бўлсин. Бундай туйғуларни давлатимиз билан ёнма ён туриб, ўз роҳатимиздан кечиб халқимизга улашайлик. Бизнинг савобларимиз сизга ҳам тегсин. Тўрт кунлик дунёда яхшилик, меҳр- оқибатдан ўзга нима қолади? Икки қарич кафандан ўзгасига ҳеч бир банда арзимас. Моҳиятни англамоқ онлари келмадими?

Нурсафардий...

Мақола манбаси:
www.nursafardiyya-sufism.uz